ASAL USUL ARUNG MAMPU

YINA RIPAMMULASI RAMPE-RAMPE ATTORIOLONGE RI MAMPU

Aja kumabusung; Aja kumaweda-weda rampe-rampe aseng toleba, billa pilla wija tolebbi,Apapisseng paenrei riunga timu; Puang riolota ri Mampu; Masenne lila, mawampa sumpa; teppu-teppu wija tomangkau; taniya upomabusung apa utanri wijasengko’na siasennae.
Nayi ammulanna manurunge ri Mampu kowi ricappana bulue riyasenge : LAPAKKAREAWA (GUTTU TELEMMA); guttui billae, pewang tanae, pitung essoi kuwa pettakkape’ takko engka rita tau tudang dua : seuwa orowane seuwa makkunrai, orowane riyasengnge GUTTU TELEMMA, makkunrai riyasenge : WESINRALANGI; sipuanadarana moi riyaseng.

Pitumpenni muwa puranna makkuwa; makkulissi paimeng bosi, Lette, billa, riue, wewattanae ; takko engkasi tau rita tudang dua makkuwa siritu rita ri Cappana bulue; seuwa to makkunrai seuwa to orowane, sipuwana boroane matoi gare riyaseng, makkunrai riyaseng : WESENGNGENG TALAGA, orowane riyaseng LAPATURUNGI;
Nayi ritanana ri torimampue yina napogau tasiyana ada laoe sitangi napowadangi makkedae maeloko ri yala Arung, matte situru ada tomampue, engka maelo nalai riyajae engka maelo malai Arung ri laue.
Napada patettongi bola, nateya mupa siduppa akkuluadangenna.
Nayina nasituruki to Mampue, pasiyala aga mappada tiwina papuwale ota, nayina puwatta GUTTU TELEMMA pobainei puwatta GUTTU TALAGA (WESENGNGENG TALAGA) anadaranna ri lau, najajiyang ana seuwa ana orowane riyaseng ODDANG PATARA yina riyala Arung ri to Mampu, inappani makkuling ada to Mampu Puwatta Manurunge, makkedai to Mampu ana muna Puwang kayala Arung, kilaowangngi ata sipulang kiabbolanngi silellang, maupepa mapadai sukatie rudaiwi to muttawammu ridewa toi, makkedani Puwatta Manurunge, engkai muwalai tu anakku lao ri Mampu tamuperodongrodong temmalokko peroki tokkong.
Diposting : Ir. H. A. Abdu Samad H. A. Umar,M.Si